Luke 20

1Niabot ang usa ka adlaw, sa dihang si Jesus nagtudlo sa mga tawo didto sa templo ug nagsangyaw sa ebanghelyo, ang pangulong mga pari ug ang mga manunulat miadto kaniya kauban ang mga kadagkoan. 2Sila miingon kaniya, “Sultihi kami unsay katungod nimo sa pagbuhat niining mga butanga? O kinsa siya nga naghatag kanimo niini nga katungod?”

3Siya mitubag ug miingon kanila, “Ako usab mangutana kaninyo. Sultihi ko mahitungod 4sa pagbawtismo ni Juan. Kadto ba gikan sa langit o gikan sa mga tawo?”

5Sila nangatarongan sa ilang mga kaugalingon, miingon, “kung kita moingon, ‘Gikan sa langit,’ siya moingon, ‘Unya ngano man nga wala kamo motuo kaniya?’ 6Apan kung kita moingon, ‘Gikan sa tawo,’ tanang tawo mobato kanato, tungod kay sila mituo nga si Juan propeta.”

7Busa sila mitubag nga wala sila makabalo asa kadto gikan. 8Si Jesus miingon kanila, “Dili usab ako mosulti kaninyo kung unsang katungod nako sa pagbuhat niining mga butanga.”

9Siya misugilon sa mga tawo niini nga sambingay, “Ang tawo nagtanom sa parasan, gipiyal kini sa mga tig-atiman sa paras, ug miadto sa laing kaumahan sa dugay nga panahon. 10Sa gitakda nga panahon siya nagpadala ug sulugoon ngadto sa tig-atiman sa paras, nga sila kinahanglan mohatag kaniya sa bunga sa parasan. Apan gikulata siya sa mga nag-atiman sa paras, ug gipapauli siya nga walay dala.

11Unya siya nagpadala ug lain nga sulugoon ug gikulata usab nila kini, gihimoan siya sa dakong kaulawan, ug gipapauli nga walay dala. 12Siya usab nagpadala pa gihapon sa ikatulo ka higayon ug ila usab siyang gisamaran, ug gilabay ngadto sa gawas.

13Unya ang agalon sa parasan nag-ingon, ‘Unsay akong buhaton? Akong ipadala ang akong pinalanggang anak. Basin ila kining tahuron.’ 14Apan sa dihang nakita siya sa mga tig-atiman sa paras, sila nag-inistoryahanay, miingon, ‘Kini ang manununod. Ato siyang patyon, aron ang iyang masunod nga katigayonan maatoa.’

15Gilabay nila siya pagawas sa parasan ug gipatay. Unsa unya ang pagabuhaton sa agalon sa parasan ngadto kanila? 16Siya moanhi ug laglagon kining mga tig-atiman sa paras, ug ihatag ang parasan sa uban.” Ug sa dihang nadungog nila kini, sila miingon, “Dili itugot sa Dios!”

17Apan si Jesus mitan-aw kanila, ug miingon, “Unsa ang ipasabot niinig kasulatan? ‘Ang bato nga gisalikway sa magtutukod, nahimo nga pundasyon’? 18Matag usa nga mahulog niadtong batoha mapulpog. Apan kung kinsa ang mahulogan niini madugmok.”

19Busa ang mga manunulat ug mga pangulong pari nangita ug paagi kung unsaon nila pagdakop kaniya niadtong orasa, kay sila nakahibalo nga siya naghisgot sa maong sambingay batok kanila. Apan nahadlok sila sa mga tawo. 20Gibantayan siya pag-ayo, sila nagpadala ug mga espiya nga nagpakaaron-ingnon nga matarong, nga sila unta makakita ug sayop sa iyang gipamulong, aron matugyan nila siya ngadto sa pagdumala ug kagamhanan sa gobernador.

21Sila nganutana kaniya, miingon, “Magtutudlo, nakahibalo kami nga ikaw nagsulti ug nagtudlo sa husto, ug wala nadani ni bisan kinsa, apan ikaw nagtudlo sa kamatuoran mahitungod sa pamaagi sa Dios. 22Uyon ba sa balaod nga kami mobayad sa buhis kang Cesar, o dili?”

23Apan nasabtan ni Jesus ang ilang pagkamaro, ug miingon kanila, 24“Ipakita kanako ang denaryo. Kang kinsang dagway ug ngalan ang nahisulat niini?” Sila miingon, “kang Cesar.”

25Siya miingon kanila, “Ihatag kang Cesar ang mga butang nga kang Cesar, ug sa Dios, ang mga butang nga sa Dios.” 26Ang mga manunulat ug mga pangulong pari walay ikasaway sa iyang giingon atubangan sa mga tawo. Sila nahibulong sa iyang tubag ug wala silay nasulti.

27Sa dihang ang pipila ka mga Saduseo miadto kaniya, ang mga nag-ingon nga walay pagkabanhaw, 28sila nangutana kaniya, miingon, “Magtutudlo, si Moises nagsulat kanato nga kung ang igsoon nga lalaki sa usa ka lalaki namatay, adunay asawa, ug walay anak, kuhaon sa igsoon nga lalaki ang asawa sa iyang igsoon, ug maghatag ug anak alang sa iyang igsoon.

29Adunay pito ka mga managsoon nga lalaki ug ang magulang nagminyo apan namatay nga walay anak, 30ug ang ikaduha usab. 31Ang ikatulo nikuha kaniya, ug sa ingon niana ang pito usab wala naka anak, ug nangamatay. 32Sa human niana ang babaye usab namatay. Sa pagkabanhaw unya, 33kang kinsang asawa kadtong babaye? Tungod kay ang pito naminyo man kaniya.”

34Si Jesus miingon kanila, “Ang mga anak niining kalibotan magminyo, ug ihatag sa kaminyoon. 35Apan sila nga gihukman nga angayan modawat sa pagkabanhaw gikan sa kamatayon ug mosulod sa walay kataposan dili magminyo o dili na ihatag sa kaminyoon. 36Dili na usab sila mamatay, kay sila managsama na sa mga anghel ug mga anak sa Dios, isip mga anak sa pagkabanhaw.

37Apan ang mga patay mabanhaw, bisan si Moises nagpakita, sa lugar kung diin may kalabotan sa gamay nga kahoy, diin siya nagtawag sa Ginoo nga Dios ni Abraham ug Dios ni Isaac ug Dios ni Jacob. 38Karon siya dili Dios sa patay, apan sa buhi, tungod kay ang tanan buhi diha kaniya.”

39Ang pipila sa mga manunulat mitubag, “Magtutudlo, maayo kaayo ang imong tubag.” 40Tungod kay sila wala na misulay pagpangutana kaniya sa daghan pang mga pangutana.

41Si Jesus miingon kanila, “Giunsa nila pagkaingon nga ang Cristo anak ni David? 42Tungod kay si David mismo miingon sa libro sa mga Salmo, Ang Ginoo miingon sa akong Ginoo, ‘Lingkod sa akong tuong dapit, 43hangtod nga ang imong mga kaaway akong himoon nga tumbanan sa imong mga tiil.’ 44Si David busa mitawag kang Cristo ug ‘Ginoo’, sa unsa nga paagi nahimo siya nga anak ni David?”

45Pagkadungog sa mga tawo siya miingon sa iyang mga disipulo, 46“Pagbantay sa mga manunulat, nga naninguha sa paglakaw nga tag-as ang mga kupo ug gusto ug pinasahi nga mga pagtagad sa merkado, ug mga lingkuranan sa pangulo sa mga sinagoga, ug pangulong mga lugar sa mga kumbira. Sila usab mangilog sa mga balay sa mga byuda, ug magpaka-aron ingnon sa pagbuhat ug tag-as nga mga pag-ampo. Kini mga maka-angkon sa dako nga paghukom sa silot.”

47